MGA KARANGALAN SA 2009 MTAP-DEPED MATH CHALLENGE, MULING HINAKOT NG SPCSHS

San Pablo City - Muling pinatunayan ng San Pablo City Science High School (SPCSHS) ang pamamayani nito sa larangan ng mathematics ng hakutin at pagwagian ng kanyang mga mag-aaral ang lahat ng Unang Karangalan sa individual and team category ng 2009 MTAP-DEPED CHALLENGE (Written Elimination) na ginanap noong nakaraang Enero 9 sa kampus ng Col. Lauro D. Dizon Memorial National High School.

Sina Edsel M. Bondad (1st yr), Gio S. Marasigan (2nd yr.), Christian Lloyd S. Tan (3rd yr.), Siena Catherine A. Maranan at Sherilyn M. Sanchez (4th yr.) ay pawang naging first placer sa individual category samantalang sa team category na binubuo nina Edsel M. Bondad, Clarissa Cacao at Diana Jean Guinto (Team 1st yr.); Gio S. Marasigan, Edlyn Gatchalian at Jessa Mae Banayo (Team 2nd yr); Christian Lloyd S. Tan, Bernadette Culaban at Aryan Guban (Team 3rd yr); at Siena Catherine A. Maranan, Sherilyn M. Sanchez at Andrei Exconde (Team 4th yr.) ay itinanghal naman na mga RANK 1 o mga nangunang team sa isinagawang math challenge para sa mga estudyante ng 21 private and public secondary schools sa Lunsod na ito . Ang mga gurong sina Venus O. Macam at Albert Saul ang tumayong Coach and Adviser ng mga nagsipagwaging mag-aaral.

“Ito’y muling pagpapatunay ng San Pablo City Science High School sa walang putol niyang paglalakbay tungo sa higit na karunungan sa larangan ng matematika at siyensya. Amin ang malaking kagalakan sapagkat sa kanyang ika-apat na taon mula nang ito’y matatag, ay nasasaksihan na ang pag-ani sa bunga ng mga binhing noon ay itinanim ng Kagawaran ng Edukasyon sa pangunguna ni DepEd Division Supt. Dr. Ester Lozada sa lilim ng mabunying pakikiisa at pakikipagtulungan ni Mayor Vicente B. Amante” wika ni Education Supervisor 1 (ES-1) at SPCSHS Officer- In-Charge Helen A. Ramos

Ang SPCSHS ay naitatag noong taong 2005 sa pagsisikap ng administrasyon ni Mayor Vicente B. Amante upang maalalayan ang Kagawaran ng Edukasyon sa pagsusulong nito sa kagalingan ng mga piling mag-aaral na may pambihirang talino at kakayanan sa larangan ng siyensya at matematika. (SANDY BELARMINO)