PD WITH MEDIA PARTNERS

Laguna Provincial Police Office (LPPO) Provincial Director P/S Supt. Felipe Rojas Jr. poses with media partners at Seven Lakes Press Corps after press conference where San Pablo City Police Station presented recovered 8 carnapped motorcycles and arrested suspects operating within the region. With PD Rojas are from left, Nani Cortez and Sandy Belarmino, president and vice-president respectively of SLPC. (CIO/Jonathan S. Aningalan)

MAY PAPEL ANG KABATAAN SA KALAYAAN - MAYOR AMANTE

San Pablo City - Ang pagkakaroon ng mahalagang papel ng mga kabataan sa kalayaan ng bayan ang naging batayan ng adbokasiya ng lokal na pamahalaan upang isulong ang kapakanan ng nasabing sector ng lipunan. Ito ang naging tampok na tema sa ika-110 taong pagdiriwang ng Araw ng Kalayaan noong Huwebes na ginanap sa liwasan ng lunsod na ito.

Sa seremonyang dinaluhan nina City Administrator Amben Amante, Board Member Rey Paras, PCL Laguna Chapter Pres. Danny Yang, Vice-Mayor Martin Ilagan, Kon. Aris Escudero at Chad Pavico, dating VM Palermo Bañagale, Dr. Ester Lozada, mga samahang sibiko at iba’t-ibang NGO, mga kawani ng pamahalaan at mga beterano ay binigyang diin ni Mayor Vicente B. Amante ang papel ng mga kabataan bilang pag-asa ng bayan.

Aniya ay ito ang kadahilanan kung bakit ang kanyang mga proyektong pangkalusugan at pang-edukasyon ay pawang nakatuon sa pagpapa-angat ng antas ng kabataan sa kanilang paglaban sa kahirapan upang makamit ng mga ito ang magandang bukas.

Sinabi pa ni Amante na ito rin ang dahilan kung bakit hindi niya pinapansin ang alin mang batikos na ibinabato sa kanyang administrasyon. Idinugtong pa ng alkalde na hindi magkakaroon ng katuparan ang pagtatayo ng Dalubhasaan ng Lunsod ng San Pablo (DLSP), mga high school annexes sa mga barangay, City Hospital at iba pang edipisyo na naglilingkod sa mga mahihirap na kabataan.

Makaraan ng palatuntunan ay pinasinayaan ang bagong Library Hub na matatagpuan sa dating CFI Building (Old Municipal Hall) na ni-restore ng Lunsod at pamamahalaan ng Deped. (7 Lakes Press Corps)

KAPAKANAN NG MGA INMATES, PRAYORIDAD NI BJMP RD NORBEL MINGOA

Inilagay ng tanggapan ng Bureau of Jail Management and Penology (BJMP) Regional Director ang kapakanan ng 8,000 bilanggo sa 36 na piitan sa rehiyon 4A upang mapatatag ang panglipunang kalagayan ng mga ito.

Dahil dito ay isang direktiba ang inilabas ni RD J/S Supt. Norbel Mingoa na umaalerto sa mga jail station sa rehiyon upang paghandaan ang pagpasok ng tag-ulan kung saan ay panahon rin ng pagsulpot ng iba’t-ibang karamdaman. Mahigpit ang kanyang naging tagubilin sa mga warden na gawin ang karampatang pag-iingat.

Minamobolisa na ni RD Mingoa ang pagpapasigla ng para-legal service sa bawat jail ng rehiyon na ang layunin ay ang mabawasan ng lima hanggang sampung porsyento ang bilang ng inmates na kanilang pinangangalagaan. Naniniwala si Mingoa na malaking kaginhawahan sa bawat jail kung tuluyan itong maisasakatuparan.

Nakapa-ilalim sa para legal activities ang pagsasanay sa mga law students na pangangasiwaan ng abogado ng Bureau, na siyang mag-aaral sa usapin ng bawat bilanggo na malaon nang hindi dinidinig ng hukuman. Ang mga nabanggit ang maghahain sa hukuman ng kahilingan upang mapalaya na ang naturang inmate, lalo na sa mga kasong hindi na itinuloy ng isang nagreklamo.

Si Mingoa bago maging pinuno ng Calabarzon BJMP ay regional director sa Region 3 ng naturang tanggapan. Nagsimula siya sa mababang katungkulan hanggang maging warden ng Caloocan City at Manila City Jail kung saan nahasa ang kanyang kakayanan. (7 LAKES PRESS CORPS)

8 MOTORSIKLO, NAREKOBER NG SAN PABLO PNP

CLAIM YOUR BIKE and FILE CHARGES- This is the appeal of San Pablo PNP Chief of Police P/Supt Joel C. Pernito to owners of these stolen motorcycles recovered by operatives of said police station from syndicate operating in the region. (NANI CORTEZ/Pres. Seven Lakes Press Corps)


San Pablo City - Nagbunga ang pagkadakip ng mga operatiba ng San Pablo PNP sa dalawang hinihinalang karnaper sa isinagawang buy burst operation kamakailan sa Brgy. Sta. Maria Magdalena lunsod na ito na humantong sa pagkakarekober ng walong pinaniniwalaang karnap na motorsiklo sa iba’t-ibang dako ng rehiyon.

Sa report na isinumiti ni COP P/Supt. Joel C. Pernito kay Laguna PD P/S Supt. Felipe Rojas Jr. ay kinilala ang dalawang suspek na sina Mark Anthony Abital alyas Macoy, 22 anyos ng Barangay III-C at Darwin Azores, 28 anyos, binata ng GreenValley Subd. Brgy. Calihan, kapwa ng lunsod na ito.

Ganap na 2:30 ng hapon noong Linggo ay nagpanggap na buyer ng motorsiklo ang mga tauhan ni P/S Insp. Francisco Barcala ng Intelligence section, kung saan nagkasundo ng bilihan sa halagang P10,000 bawat isa. Makaraan ang transaksyon ay agarang inaresto ang mga suspek. Napag-alamang ang mga nasabing motorsiklo ay kinarnap sa Lipa City at Candelaria, Quezon.

Sa isinagawang follow-up operation matapos ang interogasyon sa mga suspek ay nakabawi pa ang pulisya ng anim (6) pang kinarnap na motorsiklo sa stockyard ng naturang grupo sa loob ng isang sagingan sa may Brgy. San Bartolome. Lumilitaw sa pagsisiyasat na ang mga ito’y kinarnap sa Nagcarlan, Laguna, Calamba City at Zamboanga City.

Inaalam pa ng San Pablo PNP ang pagkakakilanlan ng iba pang miyembro ng sindikato na pinaniniwalaan ng pulisya na sangkot sa malawakang karnaping sa Calabarzon para sa kanilang ikadarakip. (NANI CORTEZ)

BUKAS ESKWELAHAN 2008, NAGING MAAYOS

Iniulat ni City Administrator Loreto S. Amante noong Martes ng tanghali na naging maayos ang pagsisimula ng pasukan sa mga paaralan sa lunsod naito, at naging matagumpay ang implementasyon ng OPLAN Balik Eskwela na magkatuwang na pinangasiwaan nina Chief of Police Joel C. Pernito at PSAF Chief Roberto P. Cuasay, na kikilos na may pakikipag-ugnayan sa Tanggapan ni City Schools Superintendent Ester C. Lozada.

Sa tagubilin ni Mayor Vicente B. Amante, iniulat din ni Amben Amante na ang OPLAN Balik Eskwela ay nagsagawa ng mga dry run simula pa noong nakaraang Mayo 26 upang ang mga tauhang itinalaga sa pagpapatupad ng plano ay maging pamilyar at magkaroon ng sapat na oryentasyon sa mga inaakalang suliraning maaaring lumitaw sa mga araw na nagsisimula na ang pasukan sa mga eskuwelahan sa kalunsuran, at maging sa mga kanayunan.

Tiniyak ni City Administrator Amben Amante na sa lahat ng antas ng mga paaralan ay napaghandaan na, maging ang suliranin sa kakailanganing silid-aralan at naihanap na ng kalutasan ni Mayor Vicente Amante.

Patuloy din ang tanggapan ni Amben Amante sa monitoring o pagsubaybay sa mga kaganapan sa mga paaralang publiko para mataya kaagad ang mga lilitaw na suliranin, samantalang sa mga pirbadong institusyon ay ang kapanatagan ng mga mag-aaral, tulad ng maayos na pangangasiwa sa daloy ng trapiko patungo sa mga private campuses sa lunsod.

Sa tagubilin ni Mayor Vicente B. Amante, hindi lamang ang kapanatagan at kaligtasan ng mga mag-aaral ang dapat pangalagaan, kundi maging ang mga panindang pagkain sa mga bisinidad ng paaralan ay dapat malinis at ligtas para sa kalusugan ng mga kabataang mag-aaral.

Pinahahalagahan ni City Administrator Loreto S. Amante ang City Health Office sa dahilang sa ilalim ng pangangasiwa ni Dr. Job D. Brion, ang tanggapan ay may patuluyang palatuntunan upang masubaybayan ang mga tindahan ng pagkain sa labas ng bakuran ng mga paaralan, at matiyak na ang tadhana ng Code on Sanitation of the Philippines ay nasusunod. (RET/Seven Lakes Press Corps)

JUNE 19, 2008 - SPECIAL NON-WORKING DAY

MALACAÑANG
Manila

BY THE PRESIDENT OF THE PHILIPPINES

PROCLAMATION NO. 1498


DECLARING THURSDAY. JUNE 19, 2008, AS SPECIAL (NON-WORKING)
DAY IN THE PROVINCE OF LAGUNA AND THE CITY OF CALAMBA.

WHEREAS, Thursday, June 19, 2008 marks the 147th birth anniversary of
Dr. Jose P. Rizal, our national hero.

WHEREAS, it is but fitting and proper that the people of the Province of
Laguna and the City of Calamba be given full opportunity to celebrate the
occasion with appropriate ceremonies in keeping with his ideals and teachings.

NOW, THEREFORE, I, EDUARDO R. ERMITA, Executive Secretary, by
Authority of Her Excellency, GLORIA MACAPAGAL-ARROYO, do hereby
declare Thursday, June 19, 2008, as special (non-working) day in the Province of
Laguna and the City of Calamba.

IN WITNESS WHEREOF, I have hereunto set my hand and caused the
Seal of the Republic of the Philippines to be affixed.

Done in the City of Manila, this 9th day of May, in the year of Our Lord,
Two Thousand and Eight.

By authority of the President:



(SGD)
EDUARDO R. ERMITA
Executive Secretary

By the Executive Secretary:

(SGD)
JOAQUIN C. LAGONERA
Senior Deputy Executive Secretary

CHEAPER and QUALITY MEDICINE BILL ni SEN. ROXAS, GANAP NANG ISANG BATAS

Si Pangulong Gloria Macapagal-Arroyo nang ito’y dumalo sa ginanap na paglagda sa Cheaper and Quality Medicine Bill. Nasa larawan din sina Laguna 3rd District Representative Ma. Evita “Ivy” R. Arago, Sen. Bong Revilla, Sen. Edgardo Angara at Senadora Pia Cayetano. (Sandy Belarmino/7 Lakes Press Corps)

Sta. Cruz, Laguna - Ganap ng isang batas ang Cheaper Medicine Bill nang lagdaan ni Pangulong Gloria Macapagal-Arroyo ang naturang panukala sa harap ng mga senador, mga mambabatas mula sa Mababang Kapulungan at mga lokal na opisyal ng lalawigang ito noong Biyernes ng umaga.

Makaraang lagdaan ng pangulo, ito ay makikilala bilang RA 9502 o Universally Accessible Cheaper and Quality Medicines Act of 2008, na magbibigay pagkakataon sa pamahalaan na amyendahan ang masalimuot na probisyon ng Intellectual Property Code at magpapalakas sa kapangyarihan ng Bureau of Food and Drugs laban sa mga mahihinang kalidad na gamot.

Ayon sa pangulo ay naging katuparan ito ng legislative reform ukol sa gamot para sa mga mahihirap sapagkat hindi lubusang malinaw ang probisyong murang gamot sa Generics Law. Sa tadhanain ng RA 9502 ay tuwirang ipinag-uutos ng batas ang cheaper at quality medicines.

Kabilang sa sumaksi sa seremonya ay sina Gob. Teresita Lazaro at mga opisyal ng lalawigan, mga punong bayan at apat na kinatawan ng Laguna na sina Cong. Ivy Arago, Cong. Dan Fernandez, Cong. Timmy Chipeco at Cong. Egay San Luis.

Sa panig ng senado ay dumalo sina Sen. Edgardo Angara, Pia Cayetano, Bong Revilla at Mar Roxas, ang principal na nag-akda ng Cheaper Medicine Bill sa senado at ang kanyang mga naging counter-part sa Mababang Kapulungan.

Sa eksklusibong panayam kay Sen. Roxas ay nagbigay siya ng katiyakan na ang RA 9502 (Cheaper and Quality Medicine Law) ang magiging katugunan upang ang mga matataas na kalidad ng gamot ay maging abot kaya ng mga mahihirap. (NANI CORTEZ)